UNEC ilə Böyük Britaniyanın De Montfort Universiteti arasında memorandum imzalanıb
Azərbaycan Dövlət İqtisad Universiteti (UNEC) dünya universitetləri ilə bərabərhüquqlu tərəfdaş olmaq istiqamətində əməkdaşlıqlarını daha da genişləndirir.
Bu istiqamətdə növbəti addım Böyük Britaniyanın De Montfort Universiteti ilə olub.
UNEC-də işgüzar səfərdə olan Böyük Britaniyanın De Montfort Universitetinin nümayəndələri öncə universitetin infrastrukturu və tədris proqtamları ilə tanış olublar.
Universitetlə tanışlıqdan sonra britaniyalı nümayəndələrin UNEC rektoru professor Ədalət Muradovla görüşü keçirilib. UNEC-in beynəlxalq standartlara uyğun fəaliyyətini yüksək qiymətləndirən xarici qonaqlar, bu ali təhsil müəssisəsi ilə əməkdaşlıq etməkdə maraqlı olduqlarını bildiriblər. Görüşdə hər iki universitet arasında mümkün əməkdaşlıq istiqamətlərində müzakirələr aparılıb. Müzakirələrin nəticəsi olaraq, rektor prof. Ədalət Muradov ilə De Montforte Universitetinin nümayəndəsi, Transmilli təhsil üzrə direktor Neil Hart arasında əməkdaşlığa dair memorandum imzalanıb.
Memorandumda müəllim-tələbə mübadiləsi, elmi tədqiqatla bağlı simpoziumların və konfransların təşkili, innovativ tədris və idarəetmə metodlarının mübadiləsi, birgə elmi və metodik nəşrlərin hazırlanması, ikili diplom, birgə magistr və bakalavr, eləcə də mini MBA proqramlarının reallaşdırılması nəzərdə tutulub.
Eyni zamanda, memorandumda ilk dəfə olaraq, ənənəvi əməkdaşlıqla yanaşı, ömürboyu təhsil, inklüziv təhsil, ətraf mühitin menecmenti, ortaq proqram və ortaq fakültənin yaradılması ilə bağlı əməkdaşlıq da öz əksini tapıb.