UNEC-in tədqiqat mərkəzi Ağıllı Kampus Bulud Şəbəkəsinə (SSCN) qoşulub
UNEC-in Nizami Gəncəvi adına Dayanıqlı İnkişaf və Yaşıl İqtisadiyyat Mərkəzi Ağıllı Kampus Bulud Şəbəkəsinə (SSCN) qoşulub.
Bu, universitetin Dayanıqlı İnkişaf məqsədləri və yaşıl iqtisadiyyat istiqamətində həyata keçirdiyi işləri gücləndirmək üçün bir addımdır.
Green TERRE Foundation tərəfindən yaradılmış Ağıllı Kampus Bulud Şəbəkəsi (SSCN), 12 ölkədən 500-dən çox ali təhsil müəssisəsinin iştirak etdiyi bir şəbəkədir və UNESCO tərəfindən dəstəklənir. Bu şəbəkənin məqsədi Dayanıqlı İnkişaf Məqsədləri (SDG) və Net Zero (Karbon tullantılarını sıfıra endirmək) hədəflərinə çatmaq üçün universitetləri birləşdirməkdir.
SSCN şəbəkəsi, universitetlər arasında dinamik bir icma yaradır və bu şəbəkəyə qoşulan universitetlər, bulud əsaslı həllər vasitəsilə kampuslarının karbon neytral olmasını təmin etməyə çalışır. Bu prosesdə əsas məqsəd, gənclərin Net Zero təşəbbüsləri haqqında biliklərini artırmaq və onların bu sahədə bacarıqlarını inkişaf etdirməkdir.
UNEC bu beynəlxalq şəbəkəyə qoşulmaqla, dayanıqlı inkişaf və yaşıl iqtisadiyyat sahəsindəki fəaliyyətlərini genişləndirməklə yanaşı, universitetin kampusunu karbon neytral etmək üçün innovativ və texnoloji həllərdən istifadə edəcək.