Tural-Dadashov-1 (1)Tural Sabir oğlu Dadaşov (1993–2016)

Tural Sabir oğlu Dadaşov 24 avqust 1993-cü ildə Bakıda anadan olub. Nizami rayon 210 saylı orta məktəbi bitirib. 2011-ci ildə 472 balla UNEC-ə qəbul olunub. 2015-ci ildə UNEC-in Kommersiya fakültəsindən məzun olaraq, hərbi xidmətə yollanıb. 2016-cı ilin aprel hadisələrində, hərbi xidmətini başa vurmasına iki ay qalmış Tərtər rayonunda gedən döyüşlərdə şəhid olub. Şəhidin meyiti aprelin 8-də döyüş meydanında aşkarlanıb. Bakıya gətirilərək, aprelin 9-da Suraxanı məzarlığında dəfn edilib.

*
*
UNEC-in iki məzunu şəhid olub (11.04.2016)

Son günlər cəbhə xəttində baş verən hərbi əməliyyatlarda Azərbaycan Ordusunun şəhid olan əsgərləri arasında Azərbaycan Dövlət İqtisad Universitetinin məzunları da var.

1993-cü il təvəllüdlü Bakı şəhər sakini Dadaşov Tural Sabir oğlu 2015-ci ildə Kommersiya fakültəsindən məzun olub. Mirzəyev Mahir Sabir oğlu isə 2014-cü ildə İqtisadiyyat və sənaye fakültəsinin məzunu olub.

Şəhidlər aprelin 9-da torpağa tapşırılıb.

Vətən uğrunda gedən döyüşlərdə Şəhidlik zirvəsində ucalan məzunlarımızın ruhu qarşısında baş əyirik. Allah Rəhmət Eləsin!

Tural-Dadashov-3 Tural-Dadashov-2 Tural-Dadashov-1 tural3_988280087_n tural87_1993066108_nTural Dadashov (27)

*
UNEC kollektivi şəhid məzunlarının məzarı başında (13.04.2016)

Azərbaycan Dövlət İqtisad Universitetinin (UNEC) rəhbərliyi, kollektivi və tələbələri son günlər cəbhə xəttində gedən döyüşlərdə qəhramancasına şəhid olan UNEC məzunlarının məzarını ziyarət ediblər.

Kommersiya fakültəsinin dekanı Mirağa Əhmədov 2015-ci ildə Kommersiya fakültəsindən məzun olan Tural Dadaşov haqqında danışaraq, onun nümunəvi tələbə olduğunu bildirib. Turalın təhsildə yüksək nəticələr göstərməsi ilə yanaşı, universitetin ictimai həyatında da fəal rol oynadığını diqqətə çatdırıb. 2014-cü ildə İqtisadiyyat və sənaye fakültəsindən məzun olan Mahir Mirzəyevlə bağlı xatirələrini dilə gətirərək, onun UNEC-ə yüksək balla qəbul olunduğunu bildirib. Mahirin vətənpərvərliyə aid bütün tədbirlərdə fəal iştirakından danışıb.

Şəhidlərin məzarı önünə əklillər qoyulüb, ruhlarına dualar oxunub.

UNEC kollektivi və tələbələr şəhid Tural Dadaşovun yaşadığı evə də gediblər. Şəhidin ailə üzvləri ilə görüşdə Vətənə layiqli övlad böyütdüyü üçün valideynlərinə təşəkkür edib, bu gün xalqın Tural kimi oğullarla qürur duyduğunu bildiriblər.

Allah rəhmət eləsin.

 *

Şəhid, UNEC məzunu Tural Dadaşov (VİDEO)

ANS televiziyasında efirə gedən “Alın yazısı” verilişi şəhid, Azərbaycan Dövlət İqtisad Universitetinin (UNEC) məzunu Tural Dadaşova həsr edilib. Verilişdə şəhidin ailə üzvləri, qrup yoldaşları və dostları onun haqqında xatirələrini bölüşüblər.

Qeyd edək ki, Dadaşov Tural Sabir oğlu 1993-cü ildə Bakı şəhərində anadan olub. 2015-ci ildə UNEC-in Kommersiya fakültəsini bitirib. Hərbi xidmətə yollanan Tural, aprel döyüşlərində Şəhidlik zirvəsinə ucalıb, şəhid olub. Tural Dadaşov aprelin 9-da torpağa tapşırılıb.

unec.edu.az saytı “Alın yazısı” verilişini təqdim edir.

*

Şəhid məzunumuzun evindən reportaj – Azvision.az  (13.04.2016)

azvision.az

Cəbhə xəttində gedən döyüşlərdə qəhramancasına şəhid olan əsgərlərimizdən biri də Bakı şəhər sakini Dadaşov Tural Sabir oğludur.

1993-cü il təvəllüdlü T. Dadaşov Azərbaycan Dövlət İqtisad Universitetinin məzunu olub.

AzVision.az-ın əməkdaşları şəhidin evinə baş çəkərək, yas mərasimində iştirak edib.

Qardaşının ad günündə ölüm xəbəri gələn şəhid…

Əməkdaşımızda həmsöhbət olan Fərid Dadaşov qardaşı Turalın ölüm xəbərini ad günündə eşitdiyini deyib: “Aprel ayının 8-də qardaşımdan təbrik gözləyirdim. Tural heç vaxt ad günümü yaddan çıxarmazdı. Həmin gün nədənsə qardaşımdan səs çıxmayınca, narahat oldum. Tural cəbhədə ağır döyüşlər başladığı vaxtdan evə zəng etmirdi. Hamımız narahat idik. Onun sağ olduğuna inanırdıq.

Düşünürdük ki, Tural ölə bilməz, ad günümdə də gözləyirdim ki, Tural zəng edib, məni təbrik edəcək. Dostlarımla doğum günümü qeyd edirdim, atam ağlayaraq zəng edib dedi ki, təcili evə gəl.

Həmin an atamın titrəyən səsindən başa düşdüm ki, Turala nəisə olub. Evə gələndə dedilər ki, qardaşın şəhid olub. Turalla fəxr edirik”.

“2 ay səbr edin, gəlib özümə toy edəcəyəm”

Qardaşının sözlərinə görə, Tural hərbi xidmətdən qayıdıqdan sonra ailə qurmağa hazırlaşırdı: “Tural mənim üçün həm böyük qardaş, həm də əsl dost idi. Onunla tez-tez əlaqə saxlayırdıq. Hərbi xidmətdən razılıq edirdi. Tural əsgərlikdə olanda sevdiyi qızın ailəsinə elçi gedib, hə cavabını almışdıq. Qardaşım bu xəbəri eşidəndə çox sevinirdi. Tural mənə mesaj yazmışdı ki, 2 ay səbr edin, gəlib toy edəcəyəm. Qardaşımın toy arzusu ürəyində qaldı. Tural ailə qurduqdan sonra xaricdə təhsil almaq istədiyini deyirdi”.

“Xonçalar hazırlayıb, qol qaldırıb oynayacaqdıq”

Şəhid əsgərin anası Kəmalə Dadaşova oğlunun qəhrəmancasına şəhid olduğunu bildirib: “Oğlum iki aydan sonra evə qayıdacaqdı. Əsgərlikdən mesaj yazmışdı ki, ana evlənmək istəyirəm. Gözləyin, qayıdıb toy edəcəyəm. Amma o, qayıda bilmədi. Tural qəhrəman kimi döyüşdü və şəhid oldu. Mən artıq nə deyə bilərəm ki? Heç bir söz Turalımı geri qaytarmayacaq.

Onun toyuna hazırlaşırdıq, planlaşdırırdıq ki, Tural qayıdandan sonra toy edəcəyik. Hamımız sevinclə o günü gözləyirdik. Xonçalar hazırlayıb, qol qaldırıb oynayacaqdıq. Amma qismət olmadı”.

“Şəhid atası adı daşımaq, çox ağırdır…”

Mərhumun atası Sabir Dadaşov vətən uğurunda şəhid olan bütün hərbçilərə Allahdan rəhmət diləyib: “Mən bu gündən şəhid atasıyam. Bütün atalar kimi, oğlumla fəxr edirəm. Tural torpaqlarımız uğurunda şəhid olub. Allah bütün şəhidlərimizə rəhmət eləsin. O, hər zaman bizimlə olacaq”.

“Turalın gözəl arzuları vardı. O, hərbi xidmətdən qayıtdıqdan sonra Türkiyədə magistratura oxuyacaqdı. Tural yüksək balla universitetə daxil olmuşdu. Atasına dəstək olmaq üçün həm oxuyur, həm də işləyirdi. Tural unversitetdə təhsil alarkən tanınmış restoranlardan birində qəlyançı işləyirmiş”-deyə şəhidin dostları bildirib.

Qeyd edək ki, şəhidin yas mərasimində Nizami rayon İcra Hakimiyyətinin, Azərbaycan Dövlət İqtisad Universitetinin rəhbərliyi, eləcə də SOCAR-ın prezidenti Rövnəq Abdullayev də iştirak edirdi.

sehidimiz turall (3)sehidimiz turall (5)sehidimiz turall (12)sehidimiz turall (17)turall11a061 sehidimiz turall (14)