ADİU əməkdaşları müharibə və əmək əlillərini ziyarət ediblər
Azərbaycan Dövlət İqtisad Universitetinin (ADİU) müəllim və tələbələri YAP Səbail rayon Qadınlar Şurasının üzvləri ilə birlikdə Əmək və Əhalinin Sosial Müdafiəsi Nazirliyinin Bilgəh qəsəbəsində yerləşən müharibə və əmək əlilləri üçün pansionatda olublar.
ADİU-nun dosenti, YAP Səbail rayon Qadınlar Şurasının sədri Təranə Kərimova pansionatın sakinlərini qarşıdan gələn Novruz bayram münasibətilə təbrik edib. Bildirib ki, “möhtərəm Prezident İlham Əliyevin rəhbərliyi ilə dövlət tərəfindən ehtiyacı olan insanlara xüsusi diqqət və qayğı ilə yanaşılır, onların rahat yaşaması, ehtiyaclarının ödənilməsi üçün gərəkli addımlar atılır. Arzumuz doğma Azərbaycanımızı firavan və xoşbəxt görməkdir. İnanırıq ki, torpaqlarımız tezliklə işğaldan azad olunacaq, xalqımız bayramlarımızı həmin torpaqlarda qeyd edəcək”.
ADİU-nun “Standartlaşma və sertifikasiya” kafedrasının müdiri, dosent Zabit Aslanov və digər ziyarətçilər də pansionatın sakinlərini bayram münasibətilə təbrik ediblər.
Sonra pansionat sakinlərinə bayram sovqatı təqdim olunub. Görüş MEA-nın folklor institutunun ansamblının konsertilə davam edib.