Azərbaycan Maliyyə-İqtisad Kollecinin əməkdaşları təltif olunublar
Azərbaycan Dövlət İqtisad Universitetinin (UNEC) nəzdində Azərbaycan Maliyyə-İqtisad Kollecinin 90 illik yubileyi münasibətilə kollec əməkdaşlarının təltifolunma mərasimi keçirilib.
Təltifolunma mərasimində çıxış edən UNEC-in inzibati və təşkilati məsələlər üzrə prorektoru dosent Şaiq Əsgərov kollec əməkdaşlarını 90 illik yubiley münasibətilə təbrik edərək, fəaliyyətlərində uğurlar arzulayıb. Şaiq Əsgərov kollecin 90 illik zəngin tarixindən söz açaraq, ölkədə orta ixtisas təhsili verən ilk kollec olan Azərbaycan Maliyyə-İqtisad Kollecinin təhsil sistemindəki özünəməxsus yerindən, müasir standartlara uyğun aparılan təhsil prosesindən və yeni nəsil mütəxəssislərin yetişməsindəki xidmətlərindən söz açıb. O, kollecin gələcəkdə də öz işini uğurla davam etdirərək, ölkənin tərəqqisinə töhfələr qazandıracağından əminliyini ifadə edib.
Sonra Azərbaycan Maliyyə-İqtisad Kollecinin 8 nəfər əməkdaşına Elm və Təhsil Nazirliyinin Fəxri fərmanları təqdim olunub.
Kollecin direktoru dosent Davud Davudov və bir qrup əməkdaş uzunmüddətli və səmərəli fəaliyyətlərində görə UNEC-in Fəxri Fərmanı və təşəkkürnamələri ilə təltif olunublar.