“Xalq qəzeti“

Ölkəmizdə son 14 il ərzində uğurla həyata keçirilən islahatlar nəticəsində yoxsulluq həddi 50 faizdən 5 faizə endirilib, 1 milyon 900 min yeni iş yeri yaradılıb, maaşlar orta hesabla 5 dəfə, pensiyalar 8 dəfə, əhalinin real gəlirləri orta hesabla 2,6 dəfə artıb.

Respublikada sosial infrastrukturun yenilənməsi, sözün həqiqi mənasında, möcüzə sayıla bilər. Belə ki, 2003-2017-ci illərdə 3100 məktəb tikilib və ya əsaslı surətdə təmir olunub, 642 xəstəxana istifadəyə verilib, 43 müasir idman kompleksi yaradılıb.

Məcburi köçkünlərin sosial-məişət şəraitinin yaxşılaşdırılması məqsədilə 92 qəsəbə və yaşayış kompleksi, 48,3 min mənzil və ya fərdi ev tikilib, 245 min məcburi köçkün müasir mənzillərlə təmin olunub. Cari ildə isə 20 mindən çox məcburi köçkünün yaşayış şəraitinin yaxşılaşdırılması nəzərdə tutulub. Bu siyasətin davam etdirilməsi prioritet vəzifə kimi qarşıya qoyulub.

Ölkənin siması köklü surətdə yenilənib, modernləşmə Azərbaycanın müasir tarixinin fərqləndirici xüsusiyyətinə çevrilib. Bakı dünyanın ən gözəl şəhərlərindən biri kimi şöhrət qazanıb, bölgələrdə həyatın keyfiyyəti köklü surətdə dəyişdirilib. Əzəmətli infrastruktur layihələrin miqyası inşa olunan 12,3 min kilometr müasir yollarda, 443 körpü və yol qovşağında, qazlaşdırmanın 93 faizə çatdırılmasında, əhalinin içməli su ilə təminatının 67 faizə yüksəlməsində ifadə olunub.

Hərtərəfli siyasi islahatlar ölkənin siyasi sisteminin təkmilləşməsini və müasir standartlara uyğunlaşmasını əsaslı surətdə təmin edib. İnsan hüquq və azadlıqları, o cümlədən siyasi azadlıqlar, söz və mətbuat azadlığı tam təmin edilib, idarəetmənin optimallaşdırılması və səmərəliliyinin artırılması sahəsində ciddi addımlar atılıb.

Azərbaycan Avropanın enerji təhlükəsizliyində mühüm rol oynayıb. Ölkəmiz bir sıra qlobal enerji və nəqliyyat layihələrinin müəllifi kimi tanınıb. Bakı-Tbilisi-Ceyhan neft, Bakı-Tbilisi-Ərzurum qaz kəmərləri, Bakı-Tbilisi-Qars dəmir yolu, TANAP, TAP layihələri məhz respublikamızın təşəbbüsü ilə reallaşıb.

Bax, Azərbaycanda 11 aprel prezident seçkiləri belə bir şəraitdə, mühüm uğurlar əldə edildiyi bir mühitdə keçiriləcək. Bəs vətəndaşlar kimə səs verəcək, kimi prezident kürsüsündə görmək istəyəcəklər? Şübhəsiz ki, xalqımız ötən illərdə əldə edilən mühüm nailiyyətlərin, sürətli inkişafın və qazanılan uğurların davam etdirilməsini, Azərbaycan dövlətinin siyasi və iqtisadi müstəqilliyinin daha da möhkəmlənməsini, ölkəmizin dünyadakı nüfuzunun daha da artmasını istəyəcəklər. Əminəm ki, bu arzu da son 20 ildəki seçkilər kimi şəffaf və demokratik şəraitdə reallaşacaq.

Vəkil HÜSEYNOV,
Azərbaycan Dövlət İqtisad Universitetinin (UNEC) professoru