“Milli dövlətçilik və müasirlik”
UNEC nəzdində Azərbaycan Maliyyə-İqtisad Kollecində Azərbaycan Xalq Cümhuriyyətinin yaranmasının 99-cu ildönümünə həsr edilən “Milli dövlətçilik və müasirlik” mövzusunda konfrans keçirilib.
Kollecin direktoru vəzifəsini icra edən, hüquq üzrə fəsləfə doktoru, dosent Oruc Məmmədov “Azərbaycan Xalq Cümhuriyyəti və müasir Azərbaycan: hüquqi varislik” mövuzunda çıxış edərək bildirib ki, 18 oktyabr 1991-ci ildə öz müstəqilliyini bərpa edən müasir Azərbaycan Respublikası, 1918-1920-ci illərdə 23 ay ərzində mövcud olan və müsəlman Şərqində ilk dünyəvi, demokratik dövlət kimi tarixə düşən Azərbaycan Xalq Cümhuriyyətinin varisidir. Azərbaycan Xalq Cümhuriyyəti xalqımızın qədim dövlətçilik ənənələrini yaşadaraq, həmin dövr üçün mütərəqqi hesab edilən dövlət təsisatlarının yaradılmasına nail olub. Gərgin və mürəkkəb ictimai-siyasi şəraitdə fəaliyyət göstərmiş Azərbaycan Xalq Cümhuriyyətinin demokratik dövlət quruculuğu, iqtisadiyyat, mədəniyyət, təhsil, hərbi quruculuq və sair sahələrdə həyata keçirdiyi işlər Azərbaycan xalqının tarixinin parlaq səhifəsidir.
Konfransda Ümummilli lider Heydər Əliyevin və Azərbaycan Respublikasının Prezidenti İlham Əliyev cənablarının Azərbaycan Xalq Cümhuriyyətinin müvafiq olaraq 80 və 90 illik yubleylərinin qeyd edilməsinə dair Sərəncamlarının əhəmiyyəti haqqında geniş məlumat verilib. Azərbaycan Respublikasının Prezidenti İlham Əliyev cənablarının “Azərbaycan Xalq Cümhuriyyətinin 100 illik yubileyi haqqında” 16 may 2017-ci il tarixli Sərəncamından irəli gələn vəzifələrdən söz açılıb.
Kollecin Ümumtəhsil fənn birləşmə komissiyasının sədri Mahal Zeynalova “Azərbaycan Xalq Cümhuriyyətinin yaranması, fəaliyyəti və süqutu: müasir baxış”, UNEC-in Tələbə Gənclər Təşkilatının sədri Rəsul Həşimov “Müstəqil Azərbaycan gənclərin gözü ilə”, kollecin I kurs tələbəsi Mədinə Paşalı “M.Ə.Rəsulzadənin həyat yolu” mövzusunda məruzə ilə çıxış ediblər. Kollecin I kurs tələbəsi Ramazan Eyvazov vətənpərvərlik ruhunda qələmə aldığı “Azərbaycan” və “Ana yurdum” şerlərini səsləndirib.
Sonda Azərbaycan Xalq Cümhuriyyətinə həsr olunan sənədli film nümayiş etdirilib.