“Ekspertiza və standartlaşdırma” fakültəsinin “İstehlak mallarının ekspertizası”, “Standartlaşdırma və sertifikasiya“, “Qida məhsullarının texnologiyası”, “Texnoloji maşınlar və sahə avadanlıqları” və “Fizika və kimya” kafedraları ləğv edilmiş və “Mühəndislik” fakültəsi, “Mühəndislik və tətbiqi elmlər” kafedrası yaradılmışdır.
“Texnoloji maşınlar və sahə avadanlıqları” kafedrası 1993-cü ildə Azərbaycan Respublikasının Nazirlər Kabinetinin 47 saylı qərarı ilə Bakı Əmtəəşünaslıq-Kommersiya İnstitutunda yaradılmışdır. 2000-ci ilin iyun ayından Azərbaycan Dövlət İqtisad Universitetinin Texnologiya və Dizayn fakültəsinin nəzdində fəaliyyət göstərir. Kafedrada Texnoloji maşınlar və avadanlıqlar mühəndisliyi istiqamətində toxuculuq, yüngül sənaye və məişət xidmətinin texnoloji maşınlar və avadanlıqlar mühəndisliyi və yeyinti sənayesi, iaşə və ticarətin texnoloji maşınlar və avadanlıqlar mühəndisliyi ixtisasları üzrə mütəxəssislər hazırlanır.
Yarandığı gündən indiyədək kafedraya texnika elmləri doktoru, professor Məzahir Fərzəliyev rəhbərlik edir.
Bu kafedranın bazasında sonralar “Standartlaşdırma və sertifikasiya”, “Dizayn” kafedraları yaradılmışdır.
Kafedrada “Maşın və mexanizmlər nəzəriyyəsi”, “Maşın hissələri” fənləri üçün laboratoriya və “Tərsimi həndəsə və mühəndis qrafikası”, “Nəzəri mexanika” fənləri üçün ixtisaslaşmış kabinet və auditoriyalar yaradılmışdır.
Kafedranın “H.Z.Tağıyev adına Toxucu Tikiş Sənaye Kombinatı” ASC-də filialı fəaliyyət göstərir. İxtisas fənləri üzrə laboratoriya məşğələ dərsləri, istehsalat və ixtisas təcrübələri bu filialda keçirilir.
*
Kafedrada tədris prosesini təşkil etmək üçün Dövlət standartları, tədris proqramları və tədris planları hazırlanmışdır. Tədris olunan bütün fənlər üzrə proqramlar nəşr edilmişdir. Tədrisin təşkilini yaxşılaşdırmaq üçün kafedrada 6 dərslik, 10 dərs vəsaiti, 10-dan artıq metodik göstəriş, 1 monoqrafiya, 200-dən artıq elmi-metodik məqalə yazılmışdır.
Kafedra respublika ali məktəblərinin (ATU, ANA, ADDA) uyğun kafedraları ilə sıx əlaqə saxlayır. Həmçinin REA-nın Maşınşünaslıq İnstitutu, Ege Universiteti (Türkiyə), Moskva Dizayn və Texnologiya Universiteti, Sankt-Peterburq Texnologiya və Dizayn Universiteti ilə əməkdaşlıq edir. Göstərilən universitetlərin və kafedraların əməkdaşları ilə birlikdə fənn proqramları, dərsliklər, dərs vəsaitləri yazılır. Elmi məqalələrə, namizədlik və doktorluq dissertasiyalarına rəylər verilir. Kafedra “Beynəlxalq maşın və mexanizmlər nəzəriyyəsi” təşkilatının (İFT MM) üzvüdür.
Kafedrada “Toxuculuq, yüngül, yeyinti sənayesi, məişət xidməti və ticarət sahələrində yeni texnologiyaların, avtomat maşınların hesablanması və layihələndirilməsi metodlarının işlənməsi” mövzusunda elmi tədqiqat işi yerinə yetirilir. Aparılmış tədqiqatlar nəticəsində fasiləsiz üsulla parça istehsal edən TMM tipli çoxəsnəkli toxucu maşınının parçaəmələgətirici mexanizminin texnoloji və konstruktiv parametrlərinin təyin edilməsi üçün metodika işlənmiş və mexanizm yaradılmışdır. Fasiləsiz üsulla parçaəmələgəlmənin nəzəri əsasları tədqiq olunmuşdur. Tədqiqatlar nəticəsində 25 ixtiraya müəlliflik şəhadətnaməsi və patent alınmışdır.
*