UNEC-in Zaqatala filialında Ulu Öndərin anadan olmasının 94-cü ildönümünə həsr edilən tədbir keçirilib.
Zaqatala rayon İcra Hakimiyyəti ilə UNEC-in Zaqatala filialının birgə təşkil etdiyi tədbirin məqsədi tələbə-gənclər arasında Heydər Əliyev irsinin təbliği olub.
Zaqatala rayon Heydər Əliyev adına Mərkəzdə təşkil olunan tədbirdə iştirakçılar Ulu Öndərin həyat yolunu əks etdirən sərgiyə baxış keçiriblər.
Filialın direktoru, professor Orucəli Rzayev Ümummilli Lider Heydər Əliyevin bəşər tarixindəki nadir tarixi şəxsiyyətlərdən, siyasət nəhəngi olmasından, Azərbaycanın milli müstəqilliyinin qorunmasında, müasir dinamik inkişafında, taleyüklü məsələlərin həllindəki misilsiz xidmətlərindən danışıb. O.Rzayev Ulu Öndərin həyat və fəaliyyətinin, siyasi irsinin, böyük ideyalarının öyrənilməsinin zəruriliyini vurğulayıb.
Filialın müəllimi, dosent Camal Arıxov “Ümummilli lider Heydər Əliyevin xarici siyasət strategiyası” adlı məruzə ilə çıxış edib. Alim məruzəsində Azərbaycanın xarici siyasətinin və dünya siyasətində yerinin müəyyənləşdirilməsində Ümummilli Liderin rolunu təhlil edib.
Çıxışlardan sonra UNEC-in Zaqatala filialının Yeni Azərbaycan Partiyasına yeni üzv olan tələbələrinə partiya biletləri təqdim edilib.
Tədbirdə Ümummilli Lider Heydər Əliyev həyat və fəaliyyətinə həsr olunan sənədli film nümayiş olunub.