UNEC-də Beynəlxalq Əlilliyi olan şəxslər gününə həsr olunan tədbir keçirilib
Azərbaycan Dövlət İqtisad Universitetində (UNEC) 3 dekabr – Beynəlxalq Əlilliyi olan şəxslər günü”nə həsr olunmuş “Biz Bir Ailəyik” adlı inklüziv konsert proqramı keçirilib.
UNEC Tələbə Həmkarlar İttifaqı Komitəsi, UNEC İnklüziv Mərkəzi və Biz Bir Ailəyik əlilliyi olan şəxslərə dəstək İctimai birliyin birgə təşkilatçılığı ilə keçirilən tədbirdə şəhidlərin əziz xatirəsi anılıb, eşitmə və danışma məhdudiyyətli şəxslərin ifasında Azərbaycan Respublikasının Dövlət Himni səsləndirilib.
Tədbirdə çıxış edən UNEC-in tələbələrlə iş üzrə prorektoru dosent Səadət Qəndilova, UNEC İnklüziv Mərkəzinin rəhbəri Sevinc Məhsimova, Milli Məclisin deputatı Vüqar İskəndərov, Gənclərin İnkişaf və Karyera Mərkəzinin direktoru Azər Əliyev ölkəmizdə müxtəlif dərəcəli əlilliyi olan şəxslərə göstərilən diqqət və qayğıdan bəhs edib, hər bir vətəndaşın, dövlətin həmin istiqamətdə apardığı siyasətə insanlıq dəyəri kimi dəstək göstərməsinin vacibliyini vurğulayıb. Çıxış edənlər dünyamızın humanitar dəyərlərə ehtiyacı olduğunu diqqətə çatdıraraq, bu kimi tədbirlərin sosial məsuliyyətlilik, qayğıkeşlik, birlik kimi prinsipləri özündə ehtiva etdiyini vurğulayıblar. Ölkəmizdə əlilliyi olan şəxslərin qabiliyyət və bacarıqlarının üzə çıxarılması üçün göstərilən diqqət və qayğının müsbət nəticələrinin müşahidə olunduğunu deyən natiqlər, həmin vətəndaşların potensiallarını nümayiş etdirmək üçün bütün imkanların olduğunu bildiriblər.
Tədbirin bədii hissəsində incəsənət xadimləri, əlilliyi olan uşaq və gənclər bir-birindən maraqlı musiqi nömrələri və rəqslərlə çıxış ediblər. İnklüziv tədbirdə əlilliyi olan şəxslərin əl işlərinin sərgi yarmarkası da təşkil olunub.
Sonda iştirakçılara sertifikat və hədiyyələr təqdim edilib.
Tədbir Azərbaycan Dövlət İqtisad Universiteti (UNEC), Azərbaycan Respublikası Gənclər Fondu, Sosial Xidmətlər Agentliyi, YAP Nizami rayon təşkilatının rəsmi, “Qayo Group”un əsas tərəfdaşlığı, Dost İnklüziv İnkişaf və Yaradıcılıq Mərkəzi, Gənclərin İnkişaf və Karyera Mərkəzi, Gənc Könüllülər İctimai Birliyinin təşkilati dəstəyi, “Asterias” Təlim və inkişaf mərkəzinin baş sponsorluğu, “World” Karyera və peşə mərkəzinin və Bella Brendinin kreativ tərəfdaşlığı ilə keçirilib.