UNEC-in elektron universitet modeli maraqla qarşılanıb
Azərbaycan Dövlət iqtisad Universitetində professor-müəllim heyətinin iştirakı ilə beynəlxalq konfrans keçirilib. Konfrans “III Beynəlxalq İnnovativ texnologiyaların təhsildə tətbiqi və istifadəsi” mövzusuna həsr olunub. Konfransla bağlı İqtisadiyyat və Sənaye fakültəsinin dekanı dosent Asiman Quliyevin müsahibəsini təqdim edirik.
– Asiman müəllim, videokonfransın təşkilatçıları və məqsədi haqqında məlumat verərdiniz.
-Konfransın təşkilatçısı İqtisadiyyat və Sənaye ilə İnformatika və İdarəetmə fakültələri idi. Hər iki fakültənin müvafiq kafedralarının müəllimləri –mənimlə birlikdə Natiq Qurbanov, Zöhrə Həsənova, Lalə Həmidova, Aysel Xalıqzadə, Məmməd Məmmədov və başqaları elmi əsərləri ilə konfransda iştirak ediblər. Konfransın məqsədi dünya ölkələrində olan təcrübələrin, alim və mütəxəssislər tərəfindən irəli sürülən təkliflərin bölüşdürülməsi idi. Eyni zamanda bu beynəlxalq konfransın keçirilmə forması da öz növbəsində yeni innovasiya texnologiyalarının təhsilə tətbiqinin bilavasitə bir nümunəsi idi. Belə ki, konfransın onlayn şəkildə keçirilməsi eyni anda bir neçə ölkənin elm adamları və ali təhsil ocaqlarının nümayəndələri ilə fikir mübadiləsi aparmağa imkar verdi.
– Konfransda hansı ölkələrin universitetləri və elm nümayəndələri iştirak edib?
– Videokonfrans 7 ölkənin universitetləri və almləri arasında keçirilən III Beynəlxalq innovasiya konfransı idi. Konfransda Qazaxıstan, Rusiya, Avstriya, Baltikyanı ölkələr, Gürcüstan, Polşanın universitetləri və elm nümayəndələri iştirak edib.
– Daha çox hansı universitetin təklifləri və təcrübələri maraqlı idi və UNEC-də tətbiq olunan innovativ texnologiyalara münasibət necə oldu?
– Konfransda ali məktəblə yanaşı, orta məktəbdə təhsilin təşkili ilə bağlı innovasiya layihələri müzakirə olundu. Rusiya və Qazaxıstanın layihələri daha maraqlı idi.
Qeyd etmək lazımdır ki, UNEC-in son dövrlərdə ali məktəbdə innovasiya xarakterli həyata keçirdiyi layihələr konfrans iştirakçılarının böyük marağına səbəb oldu. Elektron universitet layihəsi çərçivəsində tətbiq olunan elektron jurnal, docnet.com, müəllim və tələbələrin şəxsi kabineti, elektron tribunanın tətbiqi ilə daha çox maraqlandılar və yüksək qiymətləndirdilər. Bununla bağlı çoxsaylı suallar da oldu.
– Konfransın nəticəsi barədə məlumat verərdiniz?
– Konfransda 21 məruzə dinlənildi. UNEC-in professor-müəllim heyətinin təqdim etdiyi elmi araşdırmalardan 8-i Rusiyada konfransın materiallarında nəşr olunmaq üçün tövsiyə edildi. Məlumat üçün bildirin ki, beynəlxalq videokonfrans aprel ayında da davam etdiriləcək. Konfransın təşkilat komitəsi tərəfindən mən və Natiq Qurbanov Rusiyaya dəvət edilmişik.