UNEC kollektivi Azərbaycanın istiqlaliyyəti uğrunda şəhid olan türk əsgərlərinin abidəsi önündə
UNEC-in professor-müəllim heyəti və tələbələri 28 May – Respublika Günü münasibətilə Şamaxı-Mərəzə ərazisində türk əsgərlərinin xatirəsinə ucaldılan abidəni ziyarət ediblər.
“Standartlaşdırma və sertifikasiya” kafedrasının baş müəllimi İlqar Rəcəbov bildirib ki, Türkiyə-Azərbaycan qardaşlığının simvoluna çevrilən abidə 2000-ci ildə Ümummilli lider Heydər Əliyevin göstərişi ilə 1918-ci ildə Bakının bolşevik-erməni daşnak qoşunlarından azad edilməsi uğrunda döyüşlərdə şəhid olan 1130 türk əsgərinin şərəfinə ucaldılıb. Böyük türk sərkərdəsi Nuru Paşanın rəhbərliyi ilə Qafqaz İslam Ordusu Azərbaycan xalq könüllü dəstələrinin köməyi ilə Bakını erməni-bolşevik işğalından azad edib. Bu qələbə ilə Azərbaycan Xalq Cümhuriyyəti öz hakimiyyətini ölkənin bütün hüdudlarında təmin edir, eyni zamanda dinc azərbaycanlıların kütləvi məhvinin qarşısı alınır. Abidənin şəhidlik kitabəsində Azərbaycanın azadlığı uğrunda canlarını fəda etmiş türk əsgərlərinin adları və soyadları həkk olunub.
Abidənin rəsmi açılışında Ulu öndər Heydər Əliyev və Türkiyənin o zamankı prezidenti Süleyman Dəmirəl iştirak edib.