Sultanov İlyas Mehralı oğlu

Sultanov İlyas Mehralı oğlu 18 mart 1957-ci ildə Füzuli rayonunda anadan olub. İlyas uşaqlıqdan idmanın klassik güləş növü ilə məşğul olub. Dəfələrlə rayon və respublika çempionu adını qazanıb. 1974-cü ildə Füzuli rayon Xurşudbanu Natavan adına orta məktəbi bitirərək, Dadaş Bünyadzadə adına Azərbaycan Xalq Təsərrüaftı İnstitutuna (indiki UNEC) daxil olub. 1976-cı ildə Moskva şəhərinin Vladimr vilayətində hərbi xidmətdə olub. Təhsilini başa vurduqdan sonra, Füzuli rayon istehlak cəmiyyətində əmək fəaliyyətinə başlayıb. Bir müddətdən sonra Füzuli rayon ticarət sistemi üzrə Həmkarlar Təşkilatının sədri vəzifəsində çalışıb.

Ermənistanın Azərbaycana qarşı torpaq iddiaları başlanandan sonra Füzuli rayonunda yaradılan könüllülərdən ibarət özünümüdafiə batalyonunun ilk üzvlərindən biri də İlyas idi. O, batalyonun tağım komandiri təyin edilmişdi. Füzuli rayonunun Hoğa, Qacar, Qovşadlı və Yuxarı Veysəlli kəndlərində gedən döyüşlərdə qəhrəmancasına iştirak etmişdi. 15 avqust 1992-ci ildə Füzulinin Yuxarı Veysəlli kəndi uğrunda gedən döyüşdə qəhrəmancasına həlak olub. Şəhid Füzuli rayonundakı Şəhidlər Xiyabanında dəfn olunub. Füzulinin Yuxarı Veysəlli kənd orta məktəbi onun adını daşıyır.
*

UNEC-in şəhid məzunu yad edilib (13.03.2017)

UNEC-in şəhid məzunu İlyas Sultanovun anım mərasimi keçirilib.

Bakının 229 saylı tam orta məktibində təşkil olunan tədbirdə şəhidin ailə üzvləri, yaxınları ilə birlikdə UNEC kollektivi də iştirak edib.

Azərbaycanın dövlət himni səsləndirildikdən sonra şəhidin əziz xatirəsi bir dəqiqəlik sükutla yad edilib. UNEC-in Marketinq və kommunikasiya departamentinin şəhid İ.Sultanovun arxiv sənədləri əsasında hazırladığı videoçarx nümayiş olunub.

UNEC-in “İqtisadiyyat və işlətmə” kafedrasının müəllimi Araz Aslanlı şəhid İlyas Sultanovun adının universitetdə daim hörmət və ehtiramla anıldığını bildirib. Qeyd edib ki, Azərbaycanın bütövlüyü uğrunda, torpaqlarımızın qorunmasında canlarından keçmiş şəhidlərimizin ömür yolu gənclərimizə örnəkdir. Hər bir Azərbaycan vətəndaşı öz milli qəhrəmanlarını, şəhidlərini tanımalı, onların keçdiyi həyat yolunu öyrənməlidir.

Tədbirdə UNEC-in Yaradıcılıq Mərkəzinin üzvləri Eyyub Əmiraslanov və Minayə Hüseynova vətənpərvərlik mövzusunda musiqi nömrələri ilə çıxış ediblər. Məktəblilər şeirlər səsləndirib, musiqi ifa ediblər. Şəhidin ailəsi, dostları İlyas Sultanov haqqında xatirələrini bölüşüblər.

VİDEO