Universitetlə yaşıd professor: Asif Kərimov
Martın 17-də Azərbaycan Dövlət İqtisad Universitetinin (UNEC) rektoru, professor Ədalət Muradov iqtisad elmləri namizədi, UNEC-in professoru, əməkdar müəllim Asif Kərimovla görüşüb.
Görüşdə professoru 85 illik yubileyi münasibəti ilə təbrik edən rektor, onun zəngin elmi nailiyyətini və pedoqoji fəaliyyətini yüksək dəyərləndirib. Yubilyara fəxri fərman təqdim edilib.
Asif Kərimov 1931-ci il martın 19-da Fizuli rayonunda anadan olub. 1950-ci ildə K.Marks adına Azərbaycan Xalq Təsərrüfatı adına İnstitutunun Maliyyə-kreditfakultəsinə daxil olub. 1954-cü ildə institutu fərqlənmə diplomu ilə bitirib. 1954-1957-ci illərdə Moskva Maliyyə İnstitutunun aspiranturasında əyani təhsil alıb. 1957-ci ildə SSRİ Təhsil nazirliyinin təyinatı ilə K.Marks adına Azərbaycan Dövlət Xalq Təsərrüfatı İnstitutunun Maliyyə və kredit kafedrasında müəllim kimi fəaliyyətə başlayıb.
1961-ci ildə Moskva İqtisad-Statistika institutunda namizədlik dissertasiyasını müdafiə edib. Müəllimlik fəaliyyəti dövründə maliyyə elminin nəzəri və praktiki məsələlərinə dair 100-dən çox elmi əsərlərin müəllifidir.