UNEC “Beynəlxalq Karyera Mərkəzləri” seminarında təmsil olunub

16 NOYABR 2016 | OXUNUB:
486

Türkiyənin İstanbul Texniki Universitetinin Karyera Mərkəzində TİKA, İstanbul Texniki Universiteti və Karyera və Qabiliyyət İdarə Olunması Assosiasiyasının birgə təşkilatçılığı ilə “Beynəlxalq Karyera Mərkəzləri” seminarı keçirilib. Beynəlxalq tədbirdə Azərbaycan Dövlət İqtisad Universitetini (UNEC) Karyera Mərkəzinin direktoru Fuad Əliyev təmsil edib. F.Əliyev seminar iştirakçılarına Cənubi Qafqazın ən böyük iqtisadyönümlü universiteti olan UNEC haqqında ətraflı məlumat verib. UNEC-in Karyera Mərkəzinin göstərdiyi xidmətlər barədə söz açıb, iştirakçıları maraqlandıran sualları cavablandırıb.

Seminarda həmçinin Qazaxıstan, Qırğızıstan, Türkmənistan, Gürcüstan, Bosniya və Herseqovina, Makedoniya, Kosovo, Seneqal, Sudan və digər ölkə universitetlərinin karyera mərkəzlərinin rəhbərləri iştirak edib. Onlar ölkələrindəki mövcud karyera xidməti ilə bağlı vəziyyət, iş dünyasının universitetlərin karyera mərkəzlərindən gözləntiləri, uğurlu karyera və qabiliyyət idarə olunması sahəsində təcrübələrini bölüşüblər. Dünyada karyera və qabiliyyət idarə olunması, yeni trendlər, XXI əsrdə universitet karyera mərkəzinin iş modeli mövzusunda fikir mübadiləsi aparıblar.

Dörd gün davam edən seminarın sonuncu günü iştirakçılar II Türkiyə Mühəndislik Karyera Sərgisini ziyarət ediblər.

487 4