UNEC-in müəllim və tələbələri tanınmış şirkətlərlə yaxından tanış olacaqlar

19 OKTYABR 2015 | OXUNUB:
449

Azərbaycan Dövlət İqtisad Universitetinin (UNEC) müəllim və tələbələrinin korporativ sektora informasiya turları başlayıb. Məqsəd ölkənin aparıcı şirkətlərini yaxından tanımaq, onların karyera imkanları və müasir texnologiyaları barədə məlumat əldə etməkdir.

Müəllim və tələbələr ilk olaraq “FAB Boya və Kimya Sənayesi MMC”nin müəssisələri ilə tanış olublar. Nümayəndə heyətinə şirkətin tarixi və karyera imkanları barədə geniş məlumat verilib. İstehsal sahələri və müasir laboratoriyalar nümayiş etdirilib. Laboratoriyalarda tələbələrə şirkət məhsullarının yoxlanılması və müxtəlif təcrübələrin aparılması üçün şərait də yaradılıb.

Tədbirin sonunda müəllim və tələbələri maraqlandıran suallar cavablandırılıb və şirkətin xüsusi hədiyyələri təqdim edilib.

UNEC-də analoji turların təşkili tədris ilinin sonuna kimi davam etdiriləcək. Bu müddət ərzində müəllim-tələbə heyətinə digər nüfuzlu şirkətlərlə yaxından tanış olmaq imkanı yaradılacaq.

450 1