ADİU-da Dünya Bankının ölkə üzrə hesabatı dinlənilib
Aprelin 10-da Azərbaycan Dövlət İqtisad Universitetində (ADİU) Dünya Bankının (DB) rəsmilərinin məruzəsi dinlənilib. Ali təhsil müəssisəsinin professor-müəllim və tələbə heyəti ilə keçirilən görüşdə Azərbaycan üzrə iqtisadi göstəricilərin təhlili, inkişaf konsepsiyası və ikitərəfli əməkdaşlıq layihələrindən danışılıb.
Dünya Bankının regional meneceri Larisa Leşinka, Bakı ofisinin rəhbəri Səidə Bağırova, Əməliyyatlar üzrə baş mütəxəssis Rufiz Çıraqzadə və Maliyyə Korporasiyasının Azərbaycan nümayəndəliyinin rəhbəri Aliyə Əzimova çıxışları zamanı 2015-2020-ci illər ərzində bankın Azərbaycan ilə əməkdaşlıq çərçivəsində planlaşdırılan layihələr barədə danışıblar. Məruzələr zamanı illər üzrə ölkənin ÜDM və iqtisadi inkişaf dinamikası, adambaşına düşən gəlirlərin statistikası, milli bazarın konyukturası barədə ətraflı informasiya çatdırılıb. Bildirilib ki, hazırki inkişaf dinamikası onu göstərir ki, Azərbaycanın iqtisadi siyasəti düzgün istiqamət götürüb və yaxın gələcəkdə də nəzərəçarpan nəticələr əldə olunacaq.
İnteraktiv diskusiya şəklində keçən görüşdə dayanıqlı iqtisadi inkişafın təmini üçün lazımi alətlərin icrası barədə danışılıb. İştirakçılarda maraqlandıran suallar DB nümayəndələri tərəfindən cavablandırılıb.