ADİU-nun Elmi Şurası keçirilib
Aprelin 25-də Azərbaycan Dövlət İqtisad Universiteti (ADİU) Elmi Şurasının növbəri iclası keçirilib. İclasda Tədris və təlim texnologiyaları üzrə prorektor, professor Damət Bağırovun 2014/2015-ci tədris ilinin yay imtahan sessiyasına hazırlığın vəziyyəti haqqında hesabatı dinlənilib.
Elm və innovasiyalar üzrə prorektor professor Əvəz Bayramov 2014-cü ildə ADİU-da aparılan elmi işlərin yekunları haqqında məruzə ilə çıxış edib.
İclasda bildirilib ki, imtahan sessiyasının təşkilinə, gedişinə nəzarət, yarana biləcək münaqişə və şikayətlərin yerində və operativ həll edilməsini təmin etmək məqsədilə universistetimizdə yaradılan appelyasiya komissiyasının işi daha da təkmilləşdirilib. Tələbələr sənədlərini elektron qaydada komissiyaya təqdim edə biləcəklər.
ADİU-nun rektoru, professor Ədalət Muradov və MBA Departamentinin direktoru Nazim Hacıyevin elmi məqaləsinin “Global journal for research analysis” (IMPACT 3,1218) jurnalında “The impact assessment of investment on economic growth in competitive conditions in the Republic of Azerbaijan” çap edildiyi bildirilib. Qeyd olunub ki, belə bir nüfuzlu jurnalda ilk dəfədir ki, ADİU alimlərinin məqaləsi dərc olunur və bundan sonra alimlərimiz Avropanın nüfuzlu elmi jurnallarında dərc olunan məqalələrinə görə mükafatlandırılacaqlar.
Kommersiya fakültəsinin I kurs tələbəsi Hüseynli Cabbara “Mən azərbaycanlıyam” bilik yarışmasında qalib olduğu üçün universitet tərəfindən Fəxri Fərman və hədiyyə təqdim olunub.
Sonra ADİU-nun “Mövlana” proqramında yüksək nəticə əldə edən və idman yarışlarının qalibi olan tələbələrə Fəxri Fərmanlar təqdim olunub.