UNEC müəllimi Türkiyənin Sakarya Universitetində Azərbaycan həqiqətlərindən danışıb

27 FEVRAL 2016 | VIEWS:
1855

Azərbaycan Dövlət İqtisad Universitetinin (UNEC) Beynəlxalq münasibətlər kafedrasının müəllimi Pərviz Səmədov Türkiyənin Sakarya Universitetində keçirilən “Türk dünyasında erməni vəhşətləri və Xocalı soyqırımı” adlı tədbirdə iştirak edib. Sakarya Tələbə Təşkilatı, Sakarya Azərbaycan Tələbə Birliyi və Türkiyə Azərbaycan Dərnəklərinin Sakarya Təmsilçiliyinin  birgə təşkilatçılığı ilə keçirilən tədbir Anadoluda və Xocalıda ermənilərin törətdiyi türk soyqırımına həsr olunub.

Azərbaycanın və Türkiyənin millət vəkilləri, professorları, müxtəlif ölkələrin diplomat və konsulları iştirak edən tədbirdə P.Səmədov “Ermənilərin sosial quruluşu Ermənistanda doğulan elm adamının gözüylə” adlı məruzə ilə çıxış edib.

P.Səmədov bildirib ki, ermənilərin törətdiyi çox hadisələrdən dünyada, o cümlədən Türkiyədə xəbərsizdirlər. Çünki biz xoşməramlı xalqıq, düşmənçiliyi təbliğ etmək hissindən daim uzaq olmuşuq. Dünyanın müxtəlif ölkələrində 3 milyon türk qətlə yetirildiyi halda, 1915-ci ildə Türkiyəyə qarşı qiyama qalxan ermənilərin başqa ərazilərə köçürülməsi faktını əldə bayraq edib “soyqırım” iddiaları ilə çıxış edirlər. Mən burada Ermənistanda doğulmuş türk olaraq iştirak edirəm. Bu gün Türkiyədə on minlərlə erməni türklərlə tam bərabər hüquqların daşıyıcısı kimi, heç bir fərqi olmadan yaşayır. Amma bu münasibət Ermənistanda türklərə qarşı olmadı. 1700-cü ildə İrəvanda 27 nəfər erməni var idi. Necə oldu ki, 1804-cü ildə ermənilərin sayı artdı? Çünki Pyotr bölgədə bir xristian dövləti yaratmağı qarşısına məqsəd qoydu. Sonra I Yekaterina və II Yekaterina bu siyasəti davam etdirdi. Bir zamanlar İrəvandakı 4200 ailənin 3200-ü türk ailələri idi, çox az sayda erməni var idi. Sonradan Güney Azərbaycan və Osmanlı ərazisindən ermənilər İrəvana köçürüldü, say süni şəkildə artırıldı, oradakı türklər isə qətlə yetirildi, qovuldu. Bu gün də dünya türk düşmənlərinin Türkiyəyə qarşı həyata keçirdikləri terrora susur. Məruzəçi hətta ermənilərin ziyalılarının türk uşaqlarını qətlə yetirdikləri barədə etirafları xatırlatdı: “1992-ci ildə Xocalıda əsir alınan insanlardan bu günədək xəbər yoxdur. Əsir alınan insanların orqanları satılmaqdadır. Biz nə qədər ki, verilən torpaqları geri almamışıq, mübarizə davam etməlidir”.

P.Səmədov sonda konfrans iştirakçılarına özünün sovet pasportunu nümayiş etdirib: “Bu, bir sovet pasportudur, vaxtilə Azərbaycanda bu pasportlar yığılanda mən vermədim. Burada göstərilib ki, mən Ermənistanda anadan olmuşam, o torpaqlar tarixi Azərbaycan əraziləridir. Bu gün Ermənistanda 1 nəfər də olsun türk yaşamır. Bütün dünya türkləri birləşməli və türkün yurdunu türkə geri qaytarmalıdır.”

Sonra universitetdəki digər türkdilli tələbələr çıxış edib.

1856 1