Fiziki məhdudiyyətli uşaqlar UNEC-in təhsil imkanları ilə tanış olub
Martın 18-də Azərbaycan Dövlət İqtisad Universitetinin tələbələri (UNEC) “Müşviq” Qaradağın Əlil Uşaqlarına Yardım İctimai Birliyi nəzdində fəaliyyət göstərən Günərzi İcma Əsaslı Reabilitasiya Mərkəzində olub.
Mərkəzin uşaqlarına UNEC haqqında ətraflı məlumat verilib. Bildirilib ki, fiziki məhdudiyyətli gənclərin ali təhsilə inteqrasiyası istiqamətində UNEC-də zəruri tədbirlər həyata keçirilir. Bunlardan biri də, Əlilliyi olan tələbələr üçün mərkəzdir. Mərkəz “Əlilliyi olan şəxslərin Azərbaycan ali təhsil müəssisələrinə inteqrasiyasının təməlinin qoyulması” TEMPUS(ESFIDIP) layihəsi çərçivəsində yaradılıb.
Sonra Mərkəzdəki uşaqlar və UNEC-in Yaradıcılıq Mərkəzi üzvlərinin iştirakı ilə Novruz şənliyi qeyd edilib.
Görüşün sonunda UNEC-in THİK-nin təşkilatçılığı ilə təşkil edilən xeyriyyə konsertindən əldə edilən vəsait hesabına Günərzi İcma Əsaslı Reabilitasiya Mərkəzinin üzvlərinə bayram sovqatı paylanıb.
Qeyd edək ki, xeyriyyə konsertində əməkdar artistlər Ədalət Şükürov, Almaz Ələsgərova, Səlim Abbasov, müğənnilər Lamiyyə Novruzova, Yaşar Yusub, Elçin Cəfərov, Vüsal Hacıyev, Əhməd Mustafayev, Elgün Hüseynov və başqaları iştirak edib. Konsertdən əldə edilən vəsaitin bir hissəsini isə UNEC tələbələri Səbail rayonunda yaşayan kimsəsiz qocalara Novruz sovqatı aparıb.