“İqtisad Universiteti deyəndə göz önündə tələbə məmnuniyyətini önə çəkən UNEC brendi canlanır”
“Səs” Media Holdinqə daxil olan eyniadlı qəzet, agentlik və televiziyanın nümayəndələri UNEC-də qış imtahan sessiyasının gedişi ilə tanış olub. “Səs” İnformasiya Agentliyinin icraçı direktoru Vəli Vəliyev, “Səs” qəzetinin baş redaktor müavini Fətulla Həsənov və SƏS TV-nin redaktoru Cabir Məmmədov UNEC-in bütün tədris binalarında təşkil edilən yazılı və test üsulu ilə keçirilən imtahan prosesini izlədikdən sonra tələbələrlə söhbət edib, onların sessiya dövründə qarşılaşdıqları problemlərlə maraqlanıblar. Tələbələrin bir neçəsi imtahanların yazılı keçirilməsini təklif edib: “Hesab edirik ki, belə olarsa, gələcək iş həyatımızda fikrimizi daha yaxşı ifadə edə bilərik. Yazılı imtahanlar məntiqi təfəkkürün inkişafına bilavasitə dəstək olur. Türk və ingilis dilində təhsil alan, eyni zamanda SABAH qruplarında oxuyan dostlarımızın timsalında bunun şahidi oluruq”.
Tədris binalarında yaradılan “Qərargah”ların fəaliyyəti ilə tanış olan media mənsublarına məlumat verilib ki, bütün müraciətlər operativ araşdırılmaqla yanaşı, ən çox verilən sual və cavablar video formatında sosial şəbəkələrdə yerləşdirilir: “Bundan başqa, tələbələrin sualları facebook vasitəsi ilə də cavablandırılır”.
Media mənsubları imtahanlarla yanaşı, Distant, qiyabi və əlavə təhsil mərkəzində qiyabi təhsil alan tələbələrin dərslərində də iştirak ediblər. UNEC nəzdində Maliyyə-İqtisad Kollecində olan jurnalistlər burada tələbələr üçün yaradılan şəraitlə tanış olub, kitab fondu ilə maraqlanıblar. Test üsulu ilə keçirilən imtahanları izləyərək, tələbələrlə söhbət ediblər. Tələbələr imtahana hazırlaşarkən heç bir çətinliklə qarşılaşmadıqlarını bildiriblər: “İmtahandan öncə suallarla birlikdə cavablar da təqdim olunub. İmtahanlara hazırlaşmaq üçün kifayət qədər də vaxtımız olub”.
İctimai nəzarətçilərə bildirilib ki, Maliyyə-İqtisad Kollecində tələbə biliyinin qiymətləndirilməsində obyektivliyin və şəffaflığın təmin edilməsi məqsədi ilə imtahanlar ilk dəfə olaraq mərkəzləşdirilmiş qaydada test üsulu ilə həyata keçirilir. Onlar Apellyasiya, İşçi-nəzarət komissiyaları və “Qərargah”ın fəaliyyətini də izləyiblər.
“Səs” İnformasiya Agentliyinin icraçı direktoru Vəli Vəliyev son zamanlar UNEC-də həyata keçirilən yeniliklərdən söz açıb: “Qürurvericidir ki, bu gün İqtisad Universiteti deyəndə göz önündə modern təhsil xidmətləri təklif edən, tələbə mənuniyyətini önə çəkən, dünyanın tanınmış universitetləri ilə ikili diplom proqramları həyata keçirən və beynəlxalq reytinqlərdə yer alan UNEC brendi canlanır. Bu, Azərbaycanın təhsil sisteminin ən böyük uğurlarından biridir”.
Sonda “Səs” Media Holdinqin nümayəndələri Radio UNEC-də Marketinq və Kommunikasiya Departamentini direktoru Rasim Şərifovun təqdimatında yayımlanan “UNEC imtahan” verilişinin qonağı olublar. Media mənsubları verilişdə müşahidələrindən söz açaraq, təəssüratlarını bölüşüblər.
Verilişin səs yazısını təqdim edirik: