Azərbaycan Dövlət
İqtİsad Unİversİtetİ

Departament haqqında

İctimaiyyətlə əlaqələr şöbəsi. Şöbə ali təhsil müəssisəsinin fəaliyyəti ilə bağlı KİV-lə əlaqələrin qurulması və ictimaiyyətin məlumatlandırılması sahəsində işlərin təşkilini və tənzimlənməsini həyata keçirir. Mətbuat konfransları, brifinqlər, qəbullar, mətbuatın fəaliyyətinin monitorinqinin aparılması, yerli və xarici medianın universitetin fəaliyyəti barədə dərc etdiyi və ya yaydığı informasiyalar barədə universitetin əməkdaşlarını məlumatlandırmaq, konfrans və simpoziumları təşkili şöbənin fəaliyyətinə daxildir. Mədəni tədbirlərin təşkili, universitetin nüfuzunun artırılması istiqamətində silsilə fəaliyyətlər də struktur bölmənin səlahiyyətinə daxildir. Şöbə həmçinin, universitetin rəsmi internet saytı üçün məlumatları hazırlayır.

“Qaynar xətt” xidməti. Azərbaycan Dövlət İqtisad Universitetinin “Qaynar Xətt”-i 2014-cü il may ayının 12-də fəaliyyətə başlayıb. “Qaynar xətt”in yaradılmasında əsas məqsəd təhsil prosesində şəffaflığı təmin etməkdir. “Qaynar Xətt”-lə əlaqə saxlamaq üçün 146-1-3 düyməsini yığmaqla universitet haqqında olan sual, şikayət və təkliflərinizi bildirmək mümkündür. Daxil olan müraciətlər operativ şəkildə cavablandırılır, təhlil tələb edən müraciətlər isə araşdırılaraq, universitetin aidiyyatı  strukturlarına yönəldilir.

Rəqəmsal Media Bölməsi. UNEC-in rəsmi saytı. 2015-ci ilin mayında Azərbaycan Dövlət İqtisad Universitetində innovasiyanın tətbiqi istiqamətində növbəti yeniliklər reallaşdırılaraq universitetin yeni rəsmi saytının – unec.edu.az saytının təqdimatı olub. Rebrendinq çərçivəsində universitetin müasir tələblərə cavab verən, təkmilləşdirilmiş, yeni imkanlarla zənginləşdirilmiş rəsmi veb saytının təqdimatı keçirilib. UNEC (University of Economy) saytın domain adında da öz əksini tapıb. İstifadəçilərin unec.edu.az saytında lazımı informasiyanın tez bir zamanda əldə etməsi üçün müasir veb-dizayn komponentlərindən istifadə olunub. Üç dildə təqdim olunan saytda texniki və proqram təminatı cəhətdən ən müasir yeniliklər tətbiq edilib.

2016-cı ildə saytın əlavəsi kimi iOS və Android platformaları üçün mobil tətbiqetmə də istifadəçilərə təqdim olunub.

Təşkilatı məsələlər üzrə texniki xidmət bölməsi. Şöbə universitetin müxtəlif korpuslarında zallar üzrə bölgü qrafikinə əsasən keçirilən müxtəlif tədbirlərdə lazımi avadanlıqların, texniki vəsaitlərin quraşdırılması, saz, işlək vəziyyətdə olması, afişa, posterlərin hazırlanması və s. işləri həyata keçirir.

*

Yaradıcılıq Mərkəzi. Departamentin nəznində Yaradıcılıq mərkəzi fəaliyyət göstərir. Yaradıcılıq mərkəzi tələbələrinin asudə vaxtlarının səmərəli formada keçməsini təşkil edir, habelə ali təhsil müəssisəsinin daxili və xarici tədbirlərinin bədii hissəsini həyata keçirir.

Mərkəzin tərkibində 6 dərnək fəaliyyət göstərir:

• Rəqs dərnəyi
• Rəsm dərnəyi
• Teatr dərnəyi
• Vokal dərnəyi
• İnstrumental ifaçılıq dərnəyi
• Bədii-qiraət dərnəyi

Mərkəz universitetin istedadlı və həvəsli tələbələrini müvafiq dərnəklərə cəlb edir, mütəmadi şəkildə gənclərin məşqlərini təşkil edir. Mərkəz universitet tələbələrini dərnəklərin fəaliyyəti barədə məlumatlandırır, tələbələri dərnəklərə cəlb edərək əlavə bacarıqlar qazandırır, ədəbi-bədii yaradıcılıq tədbirlərini təşkil edir, tələbələrin iştirakı ilə bədii əsərləri səhnələşdirir, tələbələrdən ibarət rəqs ansamblı yaradır və təkmilləşdirir, universitet tələbələrindən ibarət həvəskar musiqi ansamblı, rəssam qrupu, aparıcı və müğənni qrupu yaradır. Mərkəz tərəfindən tələbələrin əl işlərindən ibarət sərgilər açılır, tələbələrin iştirakı ilə konsert və bədii proqramlar təşkil edilir.

Radio UNEC 2015-ci ildən fəaliyyətə başlayıb. Radio UNEC tələbələrin asudə vaxtını səmərəli keçirməsini, məlumatlandırılmasını təmin edir. Universitetimizin həyatında baş verən yenilikləri və digər məlumatları Radio UNEC-də dinləmək imkanı var.

Radio UNEC-in əsas proqram təşkilatçıları tələbələrdir. Radioda hər iki saatdan bir təqdim olunan xəbərlər informasiya proqramında iqtisadi yenilikləri dinləmək, tələbə və müəllimlərimizin iştirakı ilə maraqlı layihələrlə tanış olmaq, əyləncəli viktorinaların iştirakçısına çevrilmək mümkündür. Radioda gün ərzində zövqlü musiqini dinləmək olar.