UNEC-də Magistratura səviyyəsində tədrisin yeni standartları hazırlanır

26 OKTYABR 2015 | VIEWS:
3782

Azərbaycan Dövlət İqtisad Universitetinin (UNEC) rektoru, professor Ədalət Muradov magistraturaya qəbul olan 1-ci kurs tələbələri ilə görüş keçirib.
Rektor ilk olaraq universitetin magistratura səviyyəsində tədrisin hazırki səviyyəsinə münasibətini bildirib. “Bir çox hallarda magistraturada tədris bakalavr səviyyəsindəki tədrisin davamıdır” – deyən universitet rəhbəri burada tədris edilən əksər fənlərin əmək bazarının tələblərinə cavab vermədiyini də bildirib.
Rektor daha sonra UNEC-in magistratura ilə bağlı hədəflərindən danışıb. Bildirib ki, magistraturada fənlərin sayı əhəmiyyətli dərəcədə azaldılaraq, bazarın tələblərinə uyğunlaşdırılmalıdır. “Artıq ixtisasların siyahısına və tədris proqramlarına baxılır”- deyən rektor prosesin yekunlaşmaq üzrə olduğunu bildirib. Əlavə edib ki, magistratura səviyyəsində tədrisə dair yeni standartlar hazırlanır.
Daha sonra magistrlar onları narahat edən sualları verib və təkliflərini rektora çatdırıblar. Tələbələr müəllimlər qarşısında qoyulan tələblərin artırılmasını istəyiblər.
Təkliflərin dəyərləndiriləcəyini bildirən rektor tədbir zamanı aidiyyatı struktur rəhbərlərinə tapşırıq verərək, dekabr ayında tələbələr arasında məmnuniyyət sorğusunun keçirilməsini tapşırıb. Bildirib ki, bu sorğular əsasında tələbələr dərs deyəcək müəllimləri özləri seçə biləcəklər.

3783 1