Azərbaycan Dövlət İqtisad Universitetində (UNEC) “Tədrisin keyfiyyəti tələbələrin gözü ilə” layihəsinə start verilib. Yeniliyin əsas məqsədi UNEC-də tədris prosesinə tələbələri cəlb etmək, keyfiyyətli tədrisin təşkilində tələbələrin iştirakını təmin etmək, onların ehtiyaclarına uyğun tədris standartlarını müəyyən etmək, bununla da təhsilin səviyyəsinin yüksəldilməsini təmin etməkdir.
Layihəyə uyğun olaraq, UNEC-in tələbə təşkilatlarının fakültələrdəki nümayəndələri mütəmadi olaraq, dərs prosesi ilə əlaqədar məlumatları toplayacaqlar. Əldə edilən məlumatlar tələbə təşkilatlarının iştirakı ilə keçirilən görüşlərdə “Tədrisin keyfiyyəti tələbələrin gözü ilə” devizi altında müzakirə ediləcək. Görüşlərdə əldə edilən məlumatlar, təklif və şikayətlər əsasında fakültələr üzrə hesabat hazırlanaraq, universitet rəhbərliyinə təqdim ediləcək.
Semestrin sonunda ortaya çıxan problemlər və onların həlli istiqamətində görülən işlər tələbələrlə müzakirə edilərək, tədrisin keyfiyyətindəki müsbət dəyişikliklər barədə hesabat hazırlanacaq. Layihə həm də keyfiyyətli tədrisin təşkili sahəsində müəllim və tələbə arasında əməkdaşlığın formalaşmasına xidmət edəcək.
Layihə hazırlanarkən Avropa Keyfiyyət Təminatı Assosasiyasının “Keyfiyyat təminatı üzrə standart və qaydalar” adlı sənədi əsas götürülüb. Sənədə görə, tələbələr tədris prosesinin keyfiyyətini müəyyən edən əsas tərəflərdən biridir və onların keyfiyyət təminatı prosesinə cəlb edilməsi mühüm əhəmiyyət kəsb edir.