UNEC-də Novruz şənliyi
Novruz bayramı münasibətilə UNEC-də, universitetin Zaqatala filialı və Maliyyə-İqtisad kollecində silsilə tədbirlər keçirilib.
Bu il 70 illik yubileyi qeyd olunan UNEC-in rəssamı Arif Bektaşinin baharı əks etdirən əl işlərindən ibarət rəsm əsərlərinin sərgisi ilə başlayan Novruz şənliyində tələbələrin hazırladıqları bayram xonçaları nümayiş olunub. Universitetin dəhlizində quraşdırılan monitorlarda Novruza həsr olunan videoroliklər göstərilib.
UNEC kollektivini bayram münasibətilə universitet rəhbərliyi adından təbrik edən İnzibati və təşkilati məsələlər üzrə prorektor Şaiq Əsgərov Novruz adətlərinin təbliğ edilməsində Ulu Öndər Heydər Əliyevin əvəzsiz xidmətlərindən danışıb. Novruzun dövlət səviyyəsində qeyd olunması ilə bağlı atılan qətiyyətli addımlardan, eləcə də bayram ənənələrinin xalqımız tərəfindən bu günə qədər qorunub saxlanması və əhəmiyyətindən bəhs edib.
Tədbirin bədii hissəsində UNEC-in Yaradıcılıq Mərkəzinin tələbələrinin ifa etdikləri musiqi və rəqs nömrələrini iştirakçılar maraqla qarşılayıb.
Növruz şənlikləri Texnologiya və dizayn, İqtisadiyyat, Əmtəəşünaslıq fakültələrinin və Rus İqtisadiyyat Məktəbinin birgə təşkilatçılıqları ilə tədris binalarında da davam edib. Fakültələr arasında keçirilən “Ən yaxşı Novruz xonçası” müsabiqəsində Texnologiya və dizayn fakültəsinin hazırladığı Novruz atributlarını əks etdirən, zövqlə tərtib edilən xonçalar münsiflər tərəfindən yüksək qiymətləndirilib. Qaliblərə sertifikatlar təqdim olunub.
UNEC-in Zaqatala filialında da “Novruz bayramın mübarək, tələbə!” adlı bayram şənliyi keçirilib. Filialın professor-müəllim heyəti və tələbələrinin qatıldığı tədbirdə filialının direktoru, professor Orucəli Rzayev bayram münasibətilə iştirakçıları təbrik edib. Novruz bayramı münasibətilə tələbələr arasında keçirilən voleybol, şahmat, dama yarışlarının, inşa və rəqs müsabiqəsinin qalibləri fəxri fərmanlarla təltif olunublar.