UNEC istedadı – Şamil İsmayılov

20 APREL 2018 | VIEWS:

2295

“UNEC istedadları” layihəsinin budəfəki qəhrəmanı Maliyyə və mühasibat fakültəsinin I kurs tələbəsi Şamil İsmayılovdur.

Şamil 1999-cu il oktyabrın 5-də Bakıda anadan olub. Kiçik yaşlarından musiqiyə həvəs göstərən Şamil bunun əsas səbəbini anasının gözəl səsinin olmasında görür. O, anasının dəstəyi ilə mədəniyyət evində solist kimi dərslər almağa başlayır, bir müddət sonra isə piano üzrə musiqi təhsilinə davam edib. Məktəbdə təhsil aldığı dövrdə tədbirlərdə, musiqi yarışlarında fəal iştirak edən Şamil “Ana dilimizi sevək, sevdirək” yarışmasının şəhər turu üzrə qalibi olub. Musiqi ilə yanaşı, dərslərinə də məsuliyyətlə yanaşan Şamil orta məktəbi fərqlənmə ilə bitirərək, 2017-ci ildə UNEC tələbəsi adını qazanıb.

Şamil UNEC-də təşkil olunan bədii tədbirlərdə solist kimi çıxış edir. Digər UNEC istedadı olan qrup yoldaşı Zəka Əhmədli ilə birlikdə “The Young Star of UNEC” müsabiqəsinə qatılmağa hazırlaşır.

Şamil bakalavr pilləsini başa vurduqdan sonra, magistr təhsili almağı planlaşdırır və gələcəkdə öz ixtisası üzrə çalışmağı arzulayır. Eyni zamanda musiqi bacarıqlarını daha da inkişaf etdirərək dünyaca məşhur ifaçılardan biri olmaq istəyir.

*
UNEC istedadlarını tanıyın:

2296 2