“İslam Həmrəyliyi İli” çərçivəsində tədbirlərə start verilib – İndoneziyanın səfiri UNEC tələbələrilə görüşüb
İndoneziyanın Azərbaycandakı səfiri Hüsnan Bəy Fanani UNEC-də olub.
Beynəlxalq əlaqələr və proqramlar üzrə prorektor, dosent Şahin Bayramov 2017-ci ilin ölkəmizdə “İslam Həmrəyliyi İli” elan edilməsi haqqında Azərbaycan Respublikası Prezidentinin 10 yanvar 2017-ci il tarixli Sərəncamına diqqət çəkib. “İslam Həmrəyliyi İli”nin elan edilməsini dözümlülük, sülh, tolerantlıq və dünyəviləşmə ideyalarının təbliğində dövlətin rolunu qabardan əlamətdar hadisə adlandırıb. Bu ilin “Multikulturalizm İli”nin məntiqi davamı hesab etdiyini bildirib. IV İslam Həmrəyliyi Oyunlarının 2017-ci ildə Bakı şəhərində keçirilməsi ilə bağlı qərarın ölkəmizin İslam həmrəylinin möhkəmləndirilməsi sahəsində növbəti əməli addımlar atması üçün əlverişli şərait yaratdığını bildirib. Prorektor UNEC-də mütəmadi olaraq “İslam Həmrəyliyi İli”nə həsr olunan görüşlər təşkil ediləcəyini qeyd edib.
Səfir Hüsnan Bəy Fanani bildirib ki, Azərbaycan İndoneziya ilə münasibətlərini müstəqilliyini bərpa etdikdən sonra yaradıb və bu əlaqələr iqtisadiyyatın bütün sahələrində, xüsusən ticarət, turizm, eyni zamanda təhsil sektorunda yüksələn xətlə davam etməkdədir. İndoneziya Azərbaycanın neft ixrac etdiyi ikinci ən böyük ölkədir. Ölkəmiz Bakıda keçiriləcək IV İslam Həmrəyliyi Oyunlarına beş yüzə yaxın idmançı ilə qatılacaq. Mədəni və mental dəyərlər baxımından iki ölkənin xalqları arasında paralellər aparılmasının mümkün olduğunu bildirən səfir İndoneziyanın da multikultural, plüralist ölkə olduğunu diqqətə çatdırıb. Səfir əhalisinin sayına görə ən böyük müsəlman ölkəsi olan İndoneziya haqqında tələbələrə geniş məlumat verib. Ölkəsinin tarixi, coğrafiyası, milli xüsusiyyətləri barədə danışıb. İndoneziyanın dünyanın ən böyük iqtisadiyyatına malik G-20 ölkələri sırasında yer aldığını diqqətə çatdırıb. 2016-cı ilin rəqəmlərinə görə İndoneziya dünyanın 16-cı ölkəsidir, deyə bildirən səfir mövcud iqtisadi inkişafla 2030-cu ildə 5-ci yerdə olmağı hədəflədiklərini qeyd edib. Bildirib ki, İndoneziya hazırda iqtisadi artım tempinə görə dünyada Çin və Hindistandan sonra üçüncü dövlətdir.
Azərbaycanda səfir kimi fəaliyyət göstərməkdən məmnun olduğunu vurğulayan Hüsnan Bəy Fanani diplomat olmağın üstünlüklərindən söz açıb. Səfir UNEC tələbələrinin İndoneziyanın ali təhsil sistemi, mübadilə şərtləri, müsəlman ölkəsi kimi özəllikləri, turizm imkanları ilə bağlı suallarını cavablandırıb.
UNEC tələbələrinin intellektual səviyyəsini yüksək qiymətləndirən səfir onlarla tanışlıqdan məmnun olduğunu bildirib. Sonda Hüsnan Bəy Fanani tələbələr üçün İndoneziya musiqilərini ifa edib.