UNEC-də Yeni Azərbaycan Partiyasının yaranmasının 25-ci ildönümü münasibətilə keçirilən fakültələrarası “Nə? Harada? Nə zaman?” intellektual müsabiqəsinin qalibləri ilə görüş keçirilib.

Bilik yarışmasının qalibi SABAH qruplarının komandası olub. Maraqlı keçən müsabiqədə Beynəlxalq İqtisadiyyat Məktəbinin komandası II, İqtisadiyyat fakültəsi isə III yerin sahibi olub.

Komanda üzvlərini təbrik edən Tələbələrlə iş üzrə prorektor, dosent Səadət Qəndilova UNEC tələbələrinin mütəmadi olaraq intellektual yarışlarda iştirakını yüksək qiymətləndirib. O, gənclərin intellektual səviyyəsinin yüksəlməsinə şərait yaradan müsabiqələrin keçirilməsinin istedadlı gənclərin üzə çıxarılması və onların dəstəklənməsinə xidmət etdiyinə diqqət çəkərək, bunun dövlətin gənclər siyasətinin tərkib hissələrindən biri olduğu vurğulayıb. Tələbələrə təhsillərində uğurlar arzulayan S.Qəndilova onlara üzərlərində daim çalışmağı tövsiyə edib.

Sonra komandalarının üzvlərinə kubok, medal və sertifikatlar təqdim edilib.